sr-only.opening-hours-term

La lunga via da las dunnas svizras a la participaziun als dretgs civils e politics è vegnida elavurada en ina projecziun multimediala. La show pon ins ussa guardar en il Museum naziunal svizzer a Turitg.

Ditg èn las dunnas en Svizra stadas exclusas dals dretgs civils e politics. Il cumbat per ils dretgs da las dunnas dapi il 19avel tschientaner è stà fitg contestà e la via a la participaziun politica stentusa. L'introducziun dal dretg da votar e d'eleger da las dunnas l'onn 1971 è stà in pass impurtant en il cumbat per l'egualitad giuridica. En il rom da la projecziun plurilingua da l'uniun Omagi 2021 èn vegnids elavurads passa 350 maletgs istorics che mussan a moda impressiunanta las prestaziuns immensas da las dunnas sin via a lur dretgs politics.

Il giubileum da 50 onns dal dretg da votar e d'eleger da las dunnas è passà. Ma l'istorgia da las dunnas svizras n'è tuttina anc ditg betg raquintada a fin. Grazia ad in partenadi cun l'uniun Omagi 2021 ed al sustegn da la Fundaziun Gebert Rüf po il Museum naziunal svizzer a Turitg mussar la show multimediala dals 9 da favrer fin ils 16 d'avrigl. La projecziun che ha mess en scena la stad 2021 la Chasa federala a Berna vegn preschentada a partir da mez mars en la gronda exposiziun temporara «Zum Geburtstag viel Recht – 175 Jahre Bundesverfassung» e cumplettescha quella tematicamain a moda ideala.

Guarda la projecziun